Dacul ngonian na huringhuding na invuelto ang mga pulis y iba pang awtoridad.
Matapos ang osipon na sarong halangkaw na opisyal kang Campo Camacho ang maysadiri kang ginatos na kahoy na ikinarga daa sa trak ni Paring duman sa San Miguel, igua na naman ning nagluwas na mga malaen na bareta.
Adyan ining si Colonel Macatoon, an soboot daa tinutukan ang sarong GRO sa Ocean View para ipasakay sa motorsiklo caibahan ang sarong kagawad ning barangay. Habang nagbibiyahe daa ang convoy, sige pa ang tutok ni sir sa rikod ni Jessel, grabeng gigil ni Pay, he! he! he!
Dae daa isi kung sain dinara ni Coronel y ni Roslin ang babaye. Posibleng pinasakay naman ini sa kabayo ni Macatoon habang sige ang tutok kang badil, he! he! he! Siram sana ning iguang pang ibang badil na puti ang bala, he! he! he! Inano man daw ang putok kang masinggan ni commander?
Diyan man daa sa Virac, saro man daang ex-pulis ang capitalista ning paraputol ning kahoy diyan sa Mislagan gamit ang chainsaw. Ang specialty daa kang mga manlupig na ini mga natumbang pili y iba pang matagas na kahoy.
Sabi man kang sarong paramasid, sige pa palan daa ang report kang duwang pulis sa headquarters kang bigtime gambling lord duman sa Cavinitan. Ang duwa daang ini inorderan kang campo na protektaran ang paralotteng ta igua daang death threat laban sa gambling lord. Herac man kang ordinaryong ciudadano, ni maprotectaran sa parahabas dae naguibo ning pulis.
Simbag kang sarong harani sa caldero, dae na ngaya camo magmurong kung ngata, ta ang sabi ngani ni Lord, ang ilegal na sugal ang gabuhay ngonian sa enterong PNP, he! he! he! Dae man daa ini puedeng hiwason ni Gob Dayunyor ta matagal na ang pinagsamahan, he! he! he!
Kung siring ang palisiya sa PNP, dapat man na maghagad ang mga ilegalista nin police escort qui Col. Gani tanganing makalibre man sinda sa nangyari qui Mario Olino kang sarong taon. Tutal, libre daa ang paghagad ning escort, basta iguang lagay, he! he! he! Si Bise Gob Vicenta, puedeng maghagad ning escort na mga macho, para proteksyon sa mga bading na gustong maningil, he! he! he!
* * * * *
Grabe ang efecto kang paglansar kang candidatura ni Boboy Cua sa pagca-gobernador.
Segun sa mga alisto magbasa kang local na politica, nadanyosan ang grupo ni Congressman Cotipyo ta ang cadaclan kan saiyang mga elegidong opisyal aduman na sa campo ni Cua. Caya, hanggang taringa ang caogmahan ni Manay Cely Wong, na dagos inagda si Boboy na mag-ibahan na sinda sa altar kang COMELEC, he! he! he!
Masakit na man daa ini magkabalikan pa si JAS y Boboy ta igua na daang nana ang lugad sa bitis ni Cua. Dae man daa puedeng ipatonong ang special operations na ginigibo ngonian kang mga paracampanya ni Cua.
Posibleng igua pang mangyari sa mga maabot na semana. Alagad, inaapodan ang enterong votante na mag-atender nin banal na Misa y ipangadye na ang presenteng sitwasyon magtener na sagcod na Mayo 14.
Dapat dae nang kandidatong congressman si Boboy. Dapat dae na man ning kandidatong gobernador si JAS. Bahala na man si Gob Dayunyor y Cely Wong, ta pareho man ining mga diborsyado. Kung mangyari ini, dacul ang Santa Claus na manaltag sa Mayo! he! he!
* * * * *
Iguang pasabot na itinao ang Rotary Club of Virac sa pangengenotan ni Dr. Lito Urgel.
Ang organisasyon daang ini madonar ning duwang set ning wheelchair duman sa mga qualified na aplikante. Puede pa daa ining dagdagan kung kinakaipuhan. Ang mga parientes daa kan mga qualificado dapat magdara ning ritrato kang recipiente para maberificar ni Dr. Urgel y siguro mavisita sa kung saen.
Inaapodan man ang mga aqui, singaki, agom, tugang y iba pang parientes na grabe nang kasupgan ang tinios na isumetir ang saendang mga mahal sa buhay na sige ang candidato minsan sige man ang pagcaderota.
Ang mga wheelchair kang Rotary macatabang sa campanya, ta tibaad lalo pang kahelakan ang gasakay an candidato y dagdagan ang voto tanganing dae na magkapurit, he! he! he! Puede man ining gamiton kang mga sobra sa timbang, tanganing marinas ang paglibot-libot.
Kung dae nang icatao ang Rotary, mangapodan kita sa mga negociante na mamacal ning mga specially-designed na wheelchair sa America o China. Igua nang cahangan ning tubig, biscuit, dolce, ipanaltag na polyetos na iguang naka-stapler na veinte pesos, speak louder na 1000 watts, alcohol na pamahid sa naatian na camot, y maquinang diesel tanganing abante sana minsan matarhod, he! he! he!